CURTOS PARA REFLEXIONAR

Traballámolos nas clases, pero pedimos colgalos no blog porque queríamos velos nas vacacións e compartilos na casa coas nosas familias.

  

BELIEVE IN LOVE. BELIEVE IN CHRISTMAS

Precioso, emotivo, doce, tenro... Minuto e medio  que visionamos sen pestanexar e que espontaneamente aplaudimos cando chegou ao final.

PIP
Curto sobre unha pequena cadela que soña con ser can-guía de persoas invidentes. É unha preciosa historia con momentos divertidos e moi emotivos. Namorounos a súa protagonista polo seu corazón e valentía.

MR. INDIFFERENT

O curto non nos deixa indiferentes. Valoramos que axudar aos demais produce máis felicidade.

 Enlace do conto de Nadal que compartimos nos últimos días do trimestre: LOS JUGUETES OLVIDADOS

CHOCOLATADA

Hoxe, para rematar o trimestre, tivemos a nosa tradicional chocolatada de Nadal servida polo alumnado de sexto. Tamén nos visitou o Apalpador, escoitamos ao coro do cole con panxoliñas e recibimos saúdos cariñosos de ex-alumnas e de ex-alumnos que pasaron polas nosas clases.

FELICES FESTAS!!!

Máis fotos clicando nas imaxes.

Tocan uns días de descanso e celebracións, voltaremos coas "pilas cargadas" e os mellores ánimos para as actividades e os proxectos que nos agardan co novo trimestre.

OS MELLORES DESEXOS PARA O ANO 2019!!!

CHARLA DA ASOCIACIÓN PROTECTORA DE ANIMAIS "OS PALLEIROS"

Xa podemos contar quen estivo hoxe con nós na biblioteca de Lampi: Gloria, Lara e Pili, membros da ASOCIACIÓN PROTECTORA DE ANIMAIS OS PALLEIROS, acompañadas por unha agarimosa cadela chamada Triana que foi a delicia de todos nós.

Explicáronnos en que consiste o seu labor sen ánimo de lucro e que se fai nun centro refuxio e de acollida como o que teñen en Campañó. Visionamos unha presentación coas imaxes dos animais que viven alí e con informacións que comentamos despois na clase. Tamén fixemos moitas preguntas.

Estes animais poden se adoptados, telos en acollida temporal ou sacalos a pasear a fin de semana. Esixen coidados, mimos, atencións, alimentación...

Lembramos: As mascotas non son xoguetes, non son obxectos, nin poden ser froito dun capricho. Son xenerosas en cariño e amizade, pero demandan responsabilidade, coidados e atencións.

Moitas grazas pola vosa visita que nos serviu para concienciarnos do traballo que realizades, sobre as consecuencias do abandono de mascotas e sobre as posibilidades que temos de colaborar. 

Velaquí algunhas imaxes da charla, do coloquio e dos "mimos" repartidos por Triana:

Clica para ver máis imaxes

UN NOVO ÓRGANO ?

Chegou unha carta das nosas mascotas que falaba dun novo órgano no corpo humano chamado INTERSTICIO. Alguén rapidamente apuntou que eso era asombroso porque damos por feito que xa se sabe todo sobre o corpo humano...

 

Asi que a proposta desta fin de semana consiste en investigar, preguntar, atopar ou consultar algunha información que engada algún dato máis do aportado pola carta.

O luns na sesión de Ciencias da Natureza intentaremos poñelo en común.

ÁNIMO!!!

ANIMACIÓN LECTORA: PREPARAMOS UNHA VISITA ESPECIAL

O luns, 17 de decembro, contamos cunha visita moi especial na biblioteca...fainos moita-moita ilusión, intentamos gardar o segredo.  En solo tres días teredes a reseña e as fotos...

En relación con esta actividade,  estes días traballaremos nas nosas aulas cos seguintes libros:

Amigos é un libro sen palabras. É un libro especial, de tenras ilustracións, pero as imaxes tamén contan historias. Toca as nosas emocións e chega aos nosos corazóns porque fala de amizade, de xente que está soa, que se sinte soa, de xente con medos, de xente maior e pequena, de xente que precisa axuda...de COMPARTIR, de facer COMPAÑÍA e de AMIZADE.

Amigos inesperados é un libro que recolle 47 historias reais e inspiradoras de animais que sen ter puntos en común establecen lazos de amizade de maneiras asombrosas.
Son relatos curtos de amizade que estamos a ler con moito interese e curiosidade. 

Fixámonos nos protagonistas e nos lugares onde sucederon. Tamén curioseamos as fotos e aprendemos sobre o comportamento animal.

OBRADOIRO PRÁCTICO DE PREVENCIÓN DA DOR DE COSTAS

Hoxe tivemos a segunda parte do OBRADOIRO. Estivo a cargo do fisioterapeuta Manuel Fraiz e as estudiantes de Fisioterapia Cecilia e Olalla. 

Quedaramos emprazadas e emprazados para poñer en práctica todo o que aprendimos na primeira sesión de novembro, o que limos no folleto explicativo que se nos achegou e as instruccións do cartel que temos visible na clase.

Revisamos mochilas, recordamos como cargar e colocar as mochilas, como recoller obxectos do chan sen forzar as costas, como manter unha postura axeitada na cadeira, na lectura e na escritura.

Quedamos sensibilizadas e sensibilizados e a partir de hoxe intentaremos seguir levándoo á práctica todos os consellos recibidos.

ROMERO BRITTO: ARTE E COR

Páxina web de Romero Britto

Hoxe investigamos en internet, co ordenador da clase ou cos portátiles, datos sobre este artista brasileiro con obras relacionadas co cubismo, o arte pop e a pintura de grafiti.

Vimos na pantalla moitas das súas obras e chamounos a atención o colorido de toda a súa obra e a alegría que contaxia.

Sabemos que naceu en Recife hai 55 anos e que actualmente vive en Miami.

Tamén limos que influiron no seu traballo artistas como Picasso ou Matisse.

 

Vimos algunhas das súas obras máis coñecidas na rede e agora trataremos de imitar o seu estilo para facer os deseños das tarxetas de Nadal. 

Xa temos algunhas ideas...nuns días veredes os resultados.

PARLAMENTO GALEGO

Da Constitución ao noso Estatuto de Autonomía. Do ano 1978 ao ano 1981.
Comezamos a documentarnos sobre o noso Parlamento da man dos Bolechas co capítulo:

 OS BOLECHAS VAN AO PARLAMENTO 

e co xogo enlazado na marxe esquerda do blog.

Recollemos información en diferentes formatos, limos e resumimos as informacións con esquemas. 

Himno subtitulado

4 DE DECEMBRO DE 2018: VISITA AO PARLAMENTO DE GALICIA

Visita virtual

E chegou o gran día...a esperada visita ao noso Parlamento. Estabamos cheas e cheos de curiosidades. 

Acompañounos durante o percorrido Higinio, guía do Parlamento, que fixo a visita moi amena e proveitosa.

Velaquí algunhas imaxes das salas polas que pasamos, tamén fixemos un minidebate entre as dúas clases na biblioteca do Parlamento:

Clica para ver máis fotos

O mellor non está fotografiado, pero podemos contar que celebramos o aniversario da nosa Constitución asistindo ao Pleno do Parlamento desde a Tribuna de Público. 

Estivemos moi caladiñas e caladiños escoitando a intervención dunha diputada, observamos como se desenvolveron  dúas votacións e seguimos uns minutos a intervención da Conselleira de Mar. O Presidente do Parlamento, Miguel A. Santalices, adicou un saúdo as rapazas, os rapaces e o profesorado do colexio Vilaverde e nós saúdamos con moita ilusión.

Recibimos como agasallo un libro de Fina Casalderrey que leremos con moito interese nas nosas aulas.

Foi un día estupendo!!!

CHARLA DEPORTIVA NA BIBLIOTECA

Hoxe Diego Pérez, entrenador deportivo do CLUB NATACIÓN GALAICO, ofreceunos unha charla informativa moi amena sobre a natación. Estivemos moi atentas e atentos cos videos mostrados e as explicacións que nos foi aportando...saímos con ganas de practicar.   Grazas!!!

Estilos de natación

• Estilo "pecho" (coñecido como braza)

• Estilo "crol" (coñecido como libre)

• Estilo "espalda" (coñecido como dorso)

• Estilo "mariposa"

A NOSA CONSTITUCIÓN

Enlazando coa temática da pasada semana seguimos con dereitos e deberes...e chegamos a unha NORMA para todas e todos como é a CONSTITUCIÓN ESPAÑOLA. 

O próximo 6 de decembro será o seu 40 aniversario e nas clases traballamos e aprendemos moitas cousas relacionadas con ela.

Estes días visionamos e comentamos unha presentación que comeza na familia, pasa polo noso concello de Pontevedra, a nosa comunidade Galicia, o noso país España...a Declaración de Dereitos Humanos...
Falamos das persoas que gobernan en cada unha destas entidades. Limos informacións en diferentes formatos.
Video explicativo:

 

Canción das autonomías

20-23-25 DE NOVEMBRO

O venres, 23 de novembro, conmemórase o DÍA INTERNACIONAL DA PALABRA. Insistimos na  necesidade do diálogo para eliminar toda violencia.

Esta celebración queda en medio de outras dúas datas importantes: 20 de novembro -DÍA INTENACIONAL DOS DEREITOS DA INFANCIA- e 25 de novembro -DÍA CONTRA O MALTRATO DE XÉNERO-. 

As tres datas son motivo de reflexión nas nosas aulas estes días. Falamos de palabra, diálogo, dereitos, igualdade, discriminación, compartir, axudar, colaborar...

LAMPI remitiunos unha carta  moi especial sobre esta celebración e agasallounos con dous contos sobre os que hipotetizamos, limos, traballamos, reflexionamos...e montamos un álbum de cromos.

Onte, 22 de novembro, o profe Antonio contounos dúas historias fantásticas que nos chegaron ao corazón e aproveitamos para reflexionar e relacionar contra o maltrato de xénero ou contra a violencia machista.

Velaquí algunhas fotos destas actividades:

CONCERTO "FETÉN FETÉN"

Hoxe realizamos a  primera saída escolar deste curso fóra do recinto escolar.
Foi unha grande estrea porque asistimos ao concerto didáctico do dúo FETÉN FETÉN:
Diego Galaz: Violín, violín trompeta, phonoviolín, serrucho, mandolina, gaivotas e… vacas. 
Jorge Arribas: Acordeón, frauta cadeira de camping, á de voitre, basuri, recogeval, castañuelas e… cencerro.

“Música popular con instrumentos insólitos”

Resultou moi entretido e participativo. Escoitamos composicións con instrumentos curiosos como o mandocaldeiro, a frauta cadeira e o basuri...tamén "bailamos jota" e aplaudimos moito.

Clica para ver máis fotos

Infomación e videos Fetén Fetén

FUNGOS

Hoxe tiñamos xa algunhas respostas á proposta do venres.
Comentamos as informacións recollidas durante a fin de semana.
Elia, despois de ver o blog, fixo un traballo e aportounos máis detalles. Analía mostrounos fotos curiosas dun libro monográfico sobre setas en Europa.

Recordamos do curso pasado a clasificación dos seres vivos cos seus "cinco reinos clásicos":

Falamos de fungos.

Son heterótrofos, non fabrican o seu alimento. Non teñen clorofila e, por tanto, non poden realizar a fontosíntese.

Non se moven, viven en sitios húmidos e aliméntanse doutros seres vivos.

Podemos atopalos baixo terra, sobre madeira ou sobre alimentos en descomposición.

No noso caso, os fungos do patio medraron sobre o tronco cortado dunha árbore despois duns días de chuvia.

Hai fungos de diferentes tipos: levaduras, mofos, cogomelos...

Definición no Dicionario RAG

NIN PLANTAS NIN ANIMAIS

Nova proba de investigación.
Fotos  tomadas esta mañá no patio do cole:

Que son?
Preguntade na casa, consultade, buscade...o luns comentamos.

NOVA SORPRESA ANIMAL

Os animais comunícanse entre eles e saben das nosas afeccións. Asi que se achegan polo cole e visítannos sen avisar...Esta mañá desde as ventás do grupo B "avistamos" un pequeno moucho no alero do tellado.

O bufo miraba cara a nosa clase case con tanta curiosidade coma a que puxemos nós observando os seus movementos...tiramos unha foto para comentar nesta entrada.   

                                              

Como nos fixo moita ilusión, incorporamos como agasallo un pequeno conto que ten como protagonista ao moucho Rubén que coida de que todo funcione correctamente. Clica sobre a súa portada.

Se alguén quere saber máis, suxerimos tres enlaces sobre estes curiosos animais con informacións e imaxes:

OBRADOIRO PREVENCIÓN DESVIACIÓNS DO RAQUE

Hoxe asistimos con curiosidade a un obradoiro formativo para previr a aparición de dor nas costas nos menores e reducir a súa incidencia en idades máis avanzadas.
Estivo impartido polo fisioterapeuta Manuel Fraiz da Unidade de Desviacións do Raque do Hospital de Montecelo coa colaboración de Sofía alumna de cuarto grado da Facultade de Fisioterapia.

Falamos da columna vertebral, das normas de hixiene postural e o papel fundamental que ten a actividade física regular na prevención desta dor.

Comprometímonos a poñer en práctica algúns dos consellos recibidos e contamos cunha próxima visita o próximo mes de decembro.

 Clica para ver máis fotos.

MAGOSTO 2018

Despois dunha semana pasada por auga, chegou o esperado MAGOSTO.

Foi un martes 13, soleado, alegre, festivo, divertido e compartido por todo o cole que aproveitamos ao máximo.

Comezamos a xornada montando os cucuruchos, preparando o material para o xogo da rá e organizando os equipos, pares e impares, mesturando os grupos A e B.

Paco e o alumnado de sexto, un ano máis, encargáronse de asar as castañas.

A partir das dez comenzamos cos XOGOS que cambiamos cada quince minutos:

-XOGO DA RÁ

-CASTAÑA POR DETRÁS

-QUE NON CAIA

-BOMBA

-BAILE DA CASTAÑA

-OBRADOIRO DE MAQUILLAXE

Despois do recreo, chegou a DEGUSTACIÓN de CASTAÑAS que repartiu o alumnado maior. Pelamos e comimos moitas castañas. Tamén como anécdota contamos que, agora que sabemos un chisquiño máis,  localizamos máis dun verme de gorgullo...

 Clica neste enlace para ver todas as fotos.

Pasámolo xenial!!!